İspaniyadan olan dörd nəfərlik komanda Antarktidanın sərt təbiət şəraitində qeyri-adi ekspedisiyaya hazırlaşır. Tədqiqatçılar mühərrikdən istifadə etmədən yalnız küləyin gücü ilə hərəkət edən xüsusi xizək vasitəsilə 3400 kilometr məsafə qət etməyi planlaşdırırlar. Səyahətin təxminən 85 gün davam edəcəyi gözlənilir.
Ramón Larramendi tərəfindən hazırlanmış 15 metrlik xüsusi xizək böyük uçurtmaların köməyi ilə buz üzərində hərəkət edir. Müxtəlif hava şəraitinə uyğun 20 uçurtmadan istifadə olunacaq. Vasitə təxminən 2100 kiloqram yük daşıya bilir və əlverişli şəraitdə saatda 80 kilometr sürət yığa bilər. Elmi cihazların elektrik enerjisi isə günəş panelləri vasitəsilə təmin ediləcək.
Ekspedisiya zamanı alimlər buz təbəqələrinin quruluşunu, mikroplastik çirklənməni, iqlim dəyişikliyini və ekstremal soyuqda yaşayan mikroorqanizmləri araşdıracaqlar. Həmçinin uzunmüddətli təcridin və kəskin soyuğun insan orqanizminə təsiri öyrəniləcək. Səyahətin 2027-ci ilin fevral ayının əvvəlində başa çatdırılması nəzərdə tutulur.
Prestij.media
