Türkiyə vətəndaşları üçün viza rejimini sərtləşdirən Monteneqronun Avropa İttifaqına (Aİ) üzvlük prosesi yeni maneə ilə qarşılaşıb. Xorvatiyanın etirazından sonra Monteneqronun danışıqları 2026-cı ilin sonunadək başa çatdırmasını nəzərdə tutan müddət Aİ sammitinin yekun sənədindən çıxarılıb.
Xorvatiyanın Baş naziri Andrey Plenkoviç qərarın iki ölkə arasında həllini tapmayan məsələlərlə bağlı olduğunu bildirib. Zaqreb Monteneqro ilə tarixi mübahisələrin, itkin düşmüş şəxslər məsələsinin, dəniz sərhədinin dəqiqləşdirilməsinin və tarixi “Jadran” gəmisinin qaytarılmasının həllini tələb edir.
2012-ci ildən Aİ-yə üzvlük danışıqları aparan Monteneqro 33 danışıqlar fəslindən 21-ni bağlayıb. İttifaqa yeni üzvün qəbul edilməsi üçün bütün üzv ölkələrin razılığı tələb olunduğundan Xorvatiyanın mövqeyi Monteneqronun 2028-ci ilədək üzvlük hədəfinə təsir göstərə bilər.
Prestij.media
