Prestij.media xəbər verir ki, süni intellektin milyonlarla insanı işsiz qoyacağı ilə bağlı proqnozlar hələlik özünü doğrultmur. Xüsusilə proqram mühəndisliyi sahəsində vəziyyət gözlənilənin tam əksinədir.
Araşdırmalara görə, böyük texnologiya şirkətlərində mühəndis və proqramçıların işə qəbulu son illərdə artmağa davam edir. Məlumata əsasən, Alphabet, Meta, Apple, Amazon və NVIDIA kimi nəhəng şirkətlərdə yeni işə qəbul olunanların əksəriyyətini mühəndislər təşkil edir.
Mütəxəssislər bildirirlər ki, süni intellekt proqramçıların yerini almaq əvəzinə onların məhsuldarlığını artırır. Bu isə daha çox layihənin həyata keçirilməsinə və nəticədə yeni mühəndislərə ehtiyacın yaranmasına səbəb olur.
NVIDIA-nın rəhbəri Jensen Huang da bildirib ki, şirkətdə bütün mühəndislər süni intellekt alətlərindən istifadə etsələr də, onların işi azalmayıb. Əksinə, mühəndislər əvvəlkindən daha çox layihə üzərində çalışırlar.
Ekspertlərin fikrincə, süni intellekt yaxın gələcəkdə bəzi peşələri dəyişdirə bilər, lakin mühəndislik və proqram təminatı sahəsi hələ də ən çox tələb olunan peşələrdən biri olaraq qalır.
