ABŞ-ın texnologiya nəhəngi Qualcomm süni intellekt sahəsində mövqeyini daha da gücləndirmək üçün mühüm addım atıb. Şirkət AI proqram təminatı hazırlayan Modular startapını təxminən 4 milyard dollar dəyərində səhmlə satın aldığını açıqlayıb.
Məlumata görə, bu satınalma Qualcomm-a süni intellekt modellərinin müxtəlif prosessorlarda daha səmərəli işləməsini təmin edən proqram texnologiyalarına sahib olmağa imkan verəcək. Modular-ın hazırladığı platforma proqramçıların hər çip üçün ayrıca kod yazmasına ehtiyacı aradan qaldırır.
Mütəxəssislərin fikrincə, bu addım Qualcomm-un uzun illərdir AI proqram təminatı sahəsində üstünlük qazanan NVIDIA ilə rəqabətini daha da gücləndirəcək. Şirkət xüsusilə məlumat mərkəzləri, fərdi kompüterlər və mobil cihazlarda süni intellekt həllərinin geniş tətbiqini hədəfləyir.
Razılaşma çərçivəsində Qualcomm Modular şirkətinin səhmdarlarına 19 milyondan çox yeni səhm təqdim edəcək. Satınalmanın yaxın aylarda bütün tənzimləyici prosedurlar tamamlandıqdan sonra rəsmiləşəcəyi gözlənilir.
Analitiklər hesab edirlər ki, AI bazarında rəqabət artıq təkcə daha güclü çiplərin hazırlanması ilə məhdudlaşmır. Şirkətlər üçün bu çipləri daha effektiv işlədə bilən proqram təminatına sahib olmaq da strateji üstünlüyə çevrilib. Qualcomm-un bu addımı da məhz həmin istiqamətdə atılan ən böyük investisiyalardan biri kimi qiymətləndirilir.
Prestij Media
