Tərkibində limondan 50-60 dəfəyədək çox C vitamini olduğu bildirilən acerola meyvəsi yüksək tələbatına görə “yaşıl qızıl” adlandırılır. Barbados albalısı kimi tanınan bu bitki Cənubi və Mərkəzi Amerika ilə Karib hövzəsinin isti iqlimində yetişir.
Elmi adı Malpighia emarginata olan acerola kol şəklində böyüyür və təxminən 2-3 metr hündürlüyə çatır. Kiçik meyvələri yetişdikcə yaşıldan parlaq qırmızı və tünd narıncı rəngə çevrilir. C vitamini ilə yanaşı A və B qrupu vitaminləri, həmçinin antioksidant birləşmələr də ehtiva edir.
Acerolanı uyğun şərait yaradıldıqda böyük dibçəklərdə evdə də yetişdirmək mümkündür. Bitki gün ərzində 6-8 saat birbaşa günəş işığına ehtiyac duyur və soyuqdan qorunmalıdır. Torpağın müntəzəm nəm saxlanması vacib olsa da, köklərin çürüməməsi üçün artıq suyun dibçəkdə yığılmasına yol verilməməlidir.
Prestij.media
