İspaniyanın Əndəlüs bölgəsində zeytun yığımı ilə bağlı yeni qərar qəbul edilib. Süper intensiv zeytunluqlarda gün batımından gün doğumuna qədər mexaniki yığım bir il müddətinə qadağan olunub.
Qadağa bütün zeytun yığımına şamil edilmir. Yalnız sıx şəkildə salınmış zeytunluqlarda istifadə olunan iri yığım maşınlarının gecə saatlarında işləməsinə icazə verilməyəcək.
Qərarın əsas səbəbi isə quşlardır. Araşdırmalar göstərib ki, gecələr çoxlu sayda quş zeytun ağaclarında gecələyir. Xüsusilə miqrasiya və qışlama dövründə bu ərazilər quşlar üçün mühüm sığınacağa çevrilir.
Aparılan araşdırma zamanı 137 hektarlıq ərazidə 44 yoxlama keçirilib və 66 müxtəlif növə aid 8 127 quş qeydə alınıb. Gecə mexaniki yığımının bəzi quş növlərinə mənfi təsir göstərdiyi müəyyənləşdirilib.
Qərar 2026–2027-ci il yığım mövsümü boyunca qüvvədə olacaq. Qadağaya əməl olunmasına nəzarət üçün bölgədə ən azı 80 gecə yoxlaması aparılacaq.
Quşlara zərər vermədən gecə yığımına imkan verən texnologiyaların sınaqdan keçirildiyi və rəsmi təsdiqlənmiş tədqiqat sahələrində isə istisnaya icazə veriləcək.
Hazırda Əndəlüsdə zeytun yığımı yalnız gündüz saatlarında davam etdiriləcək.
Prestij.media
