Haitinin paytaxtı Port-o-Prensə bağlı Kenscoff qəsəbəsində “Viv Ansanm” adlı dəstənin təşkil etdiyi silahlı hücum nəticəsində 43 nəfər öldürülüb. Hücum zamanı silahlı şəxslərin evləri yandırdığı və çox sayda insanı qaçırdığı bildirilir.
Yerli mətbuatın məlumatına görə, dəstə üzvləri qəsəbə mərkəzinə nəzarəti ələ keçirməyə çalışıb. Təhlükəsizlik qüvvələrinin müdaxiləsindən sonra hücumçular geri çəkilsə də, ərazidə əməliyyatların davam etdiyi açıqlanıb.
Kenscoffun meri Jan Massiyon hadisəni “qətliam” adlandırıb. BMT-nin məlumatına görə isə Haitidə 2026-cı ilin ilk üç ayında zorakılıq nəticəsində ən azı 1642 nəfər öldürülüb, 745 nəfər yaralanıb.
Prestij.media
