Prestij.media xəbər verir ki, Fransada 1 yanvar 2009-cu ildən sonra anadan olan şəxslərə siqaret satışının qadağan edilməsi təklif olunub.
Fransa Səhiyyə Sığortası Qurumunun hazırladığı hesabatda qeyd olunur ki, ölkədə tütün istifadəsinin tam aradan qaldırılması üçün əsas diqqət gənc nəslə yönəldilməlidir. Sənəddə vurğulanır ki, erkən yaşlarda siqaretə başlayan şəxslərdə nikotin asılılığı riski daha yüksək olur.
Hesabatda “tütünsüz nəsil” formalaşdırılması məqsədilə 2009-cu ildən sonra doğulanlara siqaret satışının qadağan olunması tövsiyə edilib. Bu təşəbbüs daha əvvəl Böyük Britaniyada qəbul edilən oxşar qanun layihəsinə əsaslanır.
Qeyd edək ki, Fransada ötən ildən məktəb ətrafı, parklar, çimərliklər və bağlar kimi açıq ictimai məkanlarda siqaret çəkmək qadağan edilib. Bu ilin aprel ayından isə xüsusilə gənclər arasında geniş yayılan nikotin paketləri, nikotin saqqızları və oxşar məhsulların satışı da yasaqlanıb.
