Çin və Rusiyanı birbaşa birləşdirəcək beynəlxalq kanat yolu layihəsində əsas tikinti işləri başa çatıb. Layihənin istismara verilməsi ilə iki ölkə arasında sərhəd keçidi cəmi 6–8 dəqiqə çəkəcək.
Prestij.media xəbər verir ki, 2019-cu ildə tikintisinə başlanılan layihə Çinin Heyhe şəhəri ilə Rusiyanın Blaqoveşensk şəhərini Amur (Heylunszyan) çayı üzərindən birləşdirəcək. Bu, iki ölkə arasında sərnişin daşımalarını həyata keçirən ilk beynəlxalq kanat yolu olacaq.
Təxminən 970 metr uzunluğunda olan xətt üzrə eyni vaxtda hər biri 110 sərnişin tutumuna malik iki kabin fəaliyyət göstərəcək. Sistem tam gücü ilə işlədikdən sonra ildə bir istiqamətdə təxminən 2,6 milyon sərnişinin daşınması planlaşdırılır.
Hazırda iki şəhər arasında əlaqə əsasən avtomobil körpüsü və bərə vasitəsilə təmin olunur. Yeni kanat yolu isə sərhəd keçidini xeyli sürətləndirərək sərnişinlər üçün rahat alternativ yaradacaq.
Layihənin turizm, ticarət və logistikanın inkişafına da mühüm töhfə verəcəyi gözlənilir. Rəsmi məlumatlara görə, 2026-cı ilin ilk altı ayında Heyhe sərhəd-keçid məntəqəsindən istifadə edən sərnişinlərin sayı ötən ilin eyni dövrü ilə müqayisədə 60 faizdən çox artıb. Bu isə bölgədə nəqliyyat infrastrukturuna tələbatın sürətlə yüksəldiyini göstərir.
