Alimlər müəyyən ediblər ki, ağcaqanadların bəzi insanları digərlərindən daha çox sancması təsadüfi deyil. Araşdırmalara görə, insanın bədən qoxusu, nəfəs zamanı xaric olunan karbon qazı və bədən temperaturu ağcaqanadların hədəf seçməsində əsas rol oynayır.
Mütəxəssislərin sözlərinə görə, xüsusilə dişi ağcaqanadlar uzaq məsafədən belə karbon qazını hiss edə bilir. Yaxınlaşdıqca isə bədən qoxusu, istilik və rütubət onların seçimində həlledici amilə çevrilir.
Araşdırmalar göstərib ki, dəri yağlarının parçalanması nəticəsində yaranan bəzi kimyəvi birləşmələr ağcaqanadları daha çox cəlb edir. Eyni zamanda, pivə və digər alkoqollu içkilərin qəbulu da insanları ağcaqanadlar üçün daha cazibədar edir.
Alimlər bildirirlər ki, qan qrupu, saç və ya göz rənginin ağcaqanadların seçimində mühüm təsiri yoxdur.
Mütəxəssislər qorunmaq üçün bədəni örtən geyimlərdən istifadə etməyi, ağcaqanad əleyhinə vasitələr tətbiq etməyi və alkoqol qəbulunu məhdudlaşdırmağı tövsiyə edirlər.
//Prestij.Media
