Hövsan qəsəbəsində məktəblilərin iştirakı ilə maraqlı və yaddaqalan görüş keçirilib.
Tədbirdə Milli Məclisin deputatı Sevinc Fətəliyeva, bələdiyyə sədri və nümayəndələri iştirak ediblər.
Görüş zamanı deputatın təşəbbüsü ilə Hövsan qəsəbəsinin parklarında quraşdırılan kitab stendləri barədə məlumat verilib. Bildirilib ki, stendlərdə gənclərin mütaliəyə marağını artırmaq məqsədilə müxtəlif mövzularda kitablar yerləşdirilib. Bu təşəbbüsün gənclərin dünyagörüşünün formalaşmasına və intellektual inkişafına mühüm töhfə verəcəyi vurğulanıb.
Məktəblilər çıxış edərək deputata və bələdiyyə rəhbərliyinə təşəkkürlərini bildiriblər. Onlar qeyd ediblər ki, bu cür layihələr kitab oxumağa marağı artırır, gənclərin gələcək uğurlarına və şəxsiyyət kimi formalaşmasına müsbət təsir göstərir.
Tədbir çərçivəsində şagirdlər oxuduqları əsərlərdən parçalar səsləndirib, maraqlı təqdimatlarla çıxış ediblər. Görüş səmimi və mehriban atmosferdə keçib.
Sonda Sevinc Fətəliyeva və bələdiyyə sədri məktəblilərə gələcək təhsillərində uğurlar arzulayıb, bu kimi görüşlərin davamlı olacağını bildiriblər.
Qeyd edək ki, məktəblilər tədris ilini uğurla başa vuraraq yeni tədris ilinə böyük həvəslə hazırlaşırlar. Onlar bundan sonra da müxtəlif layihələrdə fəal iştirak etməyi və yeni uğurlara imza atmağı hədəfləyirlər.
