Rusiyanın Sibir bölgəsində yerləşən İrkutsk Vəba Araşdırmaları İnstitutunda çalışan 28 yaşlı Darya Şipilovanın ölümü ətrafında mübahisələr davam edir. Oktyabrın 2-də həyatını itirən gənc qadının anası Svetlana Şipilova qızının laboratoriyada sınaq borusunu sındıraraq yoluxması barədə iddiaları rədd edib.
Ana bildirib ki, laboratoriyadakı təhlükəsizlik qaydaları belə bir hadisənin baş verməsini şübhə altına alır. O, qızının ölümünə laqeyd yanaşıldığını iddia edərək, “Qızımın ölməsinə göz yumdular” deyib. Daryanın yaxınları da onun məsuliyyətli və diqqətli əməkdaş olduğunu vurğulayıblar.
Rusiya rəsmiləri ölümün səbəbini müəyyən edilməyən pnevmoniya ilə əlaqələndirib. Bildirilir ki, təmasda olan şəxslər arasında aparılan təxminən 5 min testdə təhlükəli törədicilər aşkarlanmayıb və karantinə alınanların əksəriyyəti sərbəst buraxılıb. Bununla belə, hadisənin dəqiq səbəbi ilə bağlı beynəlxalq ictimaiyyət şəffaf məlumat verilməsini tələb edir.
Prestij.media
