Ürək və Damar Cərrahiyyəsi üzrə mütəxəssis Dos. Dr. Cüneyt Narin bildirib ki, yay aylarında havanın həddindən artıq istiləşməsi xüsusilə bypass əməliyyatı keçirmiş və stent taxılmış xəstələr üçün ciddi risklər yaradır.
Mütəxəssis qeyd edib ki, yüksək temperatur səbəbindən bədəndə yaranan maye itkisi qan dövranına mənfi təsir göstərir və ürəyin iş yükünü artırır.
Onun sözlərinə görə, xüsusilə günün 11:00–16:00 saatlarında açıq havada qalmaq təhlükəlidir. Bu zaman təzyiqdə dəyişiklik, başgicəllənmə və huşun itirilməsi kimi hallar baş verə bilər.
Dos. Dr. Narin vurğulayıb ki, xəstələr həkim məsləhəti olmadan dərman dozalarını dəyişməməlidirlər. Xüsusilə təzyiq dərmanları, qan durulaşdırıcılar və digər ürək dərmanlarının müntəzəm qəbulu vacibdir.
Mütəxəssislər həmçinin yay mövsümündə ürək xəstələrinə yüngül qidalanma, duzun azaldılması, ağır və yağlı yeməklərdən uzaq durmaq və uzun müddət hərəkətsiz qalmamaq kimi tövsiyələr verirlər.
//Prestij.media
