Boliviyada yanacağın bahalaşması ilə üzləşən fermer Etson Maçaka plastik tullantıları və köhnə avtomobil şinlərini yanacağa çevirməyə başlayıb. Öz imkanları ilə kiçik istehsal qurğusu yaradan fermer gündə 80-150 litr yanacaq istehsal edir və onu traktorlarında istifadə edir.
Fermer paytaxt La-Pasdan təxminən 35 kilometr aralıda yerləşən Ankocala kəndində yaşayır. O, piroliz üsulundan istifadə edir. Bu prosesdə plastik və rezin kimi tullantılar oksigensiz mühitdə yüksək temperaturda emal edilərək yanacaq istehsalında istifadə oluna bilən maddələrə çevrilir.
Maçakanın sözlərinə görə, özünün istehsal etdiyi yanacağın bir litri 7-10 Boliviya bolivianosuna başa gəlir. Bazarda dizelin qiyməti isə təxminən 18 bolivianodur. Boliviyanın dizel ehtiyacının 95 faizini, benzinin isə 60 faizini idxal etməsi yanacaq xərclərini fermerlər üçün daha da ağırlaşdırır.
Prestij.media
