Almaniyanın Arendsee gölündə aparılan sualtı arxeoloji tədqiqatlar zamanı təxminən 10 min 500 il əvvələ aid taxta qalıqlar aşkarlanıb. Təxminən 20 metr dərinlikdən çıxarılan parçaların insanlar tərəfindən kəsilərək formaya salındığı müəyyən edilib.
Tapıntılar arasında 1,6 metr uzunluğunda taxta dirək və 1,3 metrə çatan taxta lövhələr var. Alimlər onların təsadüfən gölə düşmüş ağac parçaları olmadığını düşünürlər. Qalıqlar qədim insanların ərazidə hansısa tikili yaratmış ola biləcəyini göstərir.
Həmin dövrdə bölgədə yaşayan insanlar əsasən ovçuluq, balıqçılıq və yığıcılıqla məşğul olurdular. Tədqiqatçılar hesab edirlər ki, tapıntılar təsdiqlənərsə, qədim icmaların yaşayış məskənləri qurması ilə bağlı mövcud təsəvvürlər dəyişə bilər. Taxtaların göl dibindəki xüsusi geoloji şərait və çöküntülər sayəsində qorunub qaldığı bildirilir. Hazırda sualtı robotlar və sonar cihazları vasitəsilə araşdırmalar davam etdirilir.
Prestij.media
