Misirin Qərbiyyə vilayətində yerləşən Behbeit əl-Hacar kəndində bir sakinin təsadüfən tapdığı yazılı daş arxeoloji kəşfə səbəb olub. Ərazidə aparılan qazıntılar zamanı qədim Misir fironu II Ramzesə aid heykəl qalıqları və digər tarixi artefaktlar aşkarlanıb.
Tapıntılar arasında hündürlüyü 1,6 metr olan heykəl başı, ikinci bir heykəlin qalıqları və heroqlif yazıları olan qranit blok var. Mütəxəssislərin fikrincə, əsas heykəl postamenti ilə birlikdə təxminən 8,5 metr hündürlüyündə ola bilər. Yazılar heykəlin eramızdan əvvəl 1279–1213-cü illərdə hakimiyyətdə olmuş II Ramzesə aid olduğunu göstərir.
Arxeoloqlar yeni tapıntıların bölgənin qədim tarixinə dair mühüm məlumatlar verəcəyini düşünürlər. Hazırda araşdırmalar davam edir. Alimlər heykəllərin ərazidəki qədim tikililərə aid olub-olmadığını və ya sonradan buraya gətirildiyini müəyyənləşdirməyə çalışırlar.
Prestij.media
