Afrikanın Niger ölkəsində neft quyusunda baş verən qəza ciddi ekoloji narahatlıq yaradıb. Təzyiqlə yer səthinə çıxan xam neft və qazın 10 metrdən çox hündürlüyə püskürdüyü bildirilir.
Hadisə sentyabrın sonlarında ölkənin şimal-şərqində yerləşən Aqadem neft yatağındakı Goumeri W-8 quyusunda baş verib. Çin şirkəti CNPC-nin yerli törəmə müəssisəsinin işlətdiyi obyektdə iki əməkdaş xəsarət alıb. Onlar xəstəxanaya yerləşdirilib, ölüm halı qeydə alınmayıb.
Niger Neft Nazirliyinin oktyabrın 12-də yaydığı məlumata görə, sızma qismən nəzarətə götürülsə də, hələ tam dayandırılmayıb. Neftin yüzlərlə metr əraziyə yayılması torpağa və bitki örtüyünə zərər vurub. Hadisənin səbəbi araşdırılır, mümkün sabotaj və terror hücumu ehtimalları isə ilkin yoxlamalarda istisna edilib. Ərazidəki digər quyuların təhlükəsizliyi üçün də tədbirlər görülür.
Prestij.media
