Alimlər ilk dəfə süni intellektin hazırladığı peyvənd komponentini insanlar üzərində sınaqdan keçiriblər. Böyük Britaniyanın Kembric Universitetində aparılan araşdırma nəticəsində koronavirusların müxtəlif növlərinə qarşı təsir göstərə biləcək yeni nəsil peyvənd hazırlanıb.
Tədqiqatçılar bildirirlər ki, süni intellekt minlərlə virusun genetik məlumatını təhlil edərək həm mövcud, həm də gələcəkdə yarana biləcək mutasiyalara qarşı qoruma təmin edən xüsusi “super antigen” yaradıb. Məqsəd pandemiyaların qarşısını əvvəlcədən almaqdır.
İlkin sınaqlar 39 nəfər üzərində aparılıb, hazırda isə təxminən 200 könüllünün iştirakı ilə növbəti mərhələ davam edir. Alimlər gələcəkdə bu texnologiyanın qrip, Ebola və quş qripi kimi təhlükəli xəstəliklərə qarşı universal peyvəndlərin hazırlanmasında istifadə olunacağını bildirirlər.
Mütəxəssislərin fikrincə, süni intellektin peyvəndlərin hazırlanmasında tətbiqi tibb sahəsində yeni dövrün başlanğıcı hesab oluna bilər.
Prestij.media
