Azərbaycanlı qrossmeyster Aydın Süleymanlı şahmat dünyasında böyük rezonans doğuran qələbəyə imza atıb. O, rapid və blits üzrə komandalararası dünya çempionatı çərçivəsində keçirilən görüşdə 16-cı dünya çempionu Magnus Carlsen üzərində möhtəşəm qələbə qazanıb.
Prestij.media xəbər verir ki, Honq Konqda baş tutan qarşılaşmada Aydın Süleymanlı dünya reytinqinin lideri hesab olunan Maqnus Karlseni məğlub edərək beynəlxalq şahmat ictimaiyyətinin diqqət mərkəzinə düşüb.
Turnirin gedişində Azərbaycanın “Odlar Yurdu” komandası da mühüm uğura imza atıb. Komanda yarışın əsas favoritlərindən sayılan “WR Chess” üzərində 3,5:2,5 hesablı qələbə qazanıb.
Qeyd edək ki, “WR Chess”in heyətində Maqnus Karlsenlə yanaşı, Fabiano Caruana, Wesley So, Maxime Vachier-Lagrave və digər tanınmış qrossmeysterlər çıxış edirlər.
Hazırda əsasən gənc şahmatçılardan ibarət olan “Odlar Yurdu” komandası 15 xalla turnir cədvəlində 8-ci pillədə qərarlaşıb.
