Kanada hərbi dəniz qüvvələrini modernləşdirmək proqramı çərçivəsində Almaniyadan 12 ədəd Type 212CD sinifli yeni sualtı qayığı almaq qərarına gəlib. Bu, ölkə tarixinin ən iri müdafiə satınalma layihələrindən biri hesab olunur.
Yeni sualtı qayıqlar Almaniyanın Thyssenkrupp Marine Systems (TKMS) şirkəti tərəfindən hazırlanıb və xüsusilə Arktika bölgəsində xidmət göstərmək üçün nəzərdə tutulub. Onlar aşağı səs izi, uzun müddət su altında fəaliyyət göstərə bilməsi və sərt iqlim şəraitinə uyğunluğu ilə seçilir.
Layihə çərçivəsində Kanadanın hazırkı Victoria sinifli sualtı qayıqları mərhələli şəkildə istismardan çıxarılacaq. İlk yeni gəmilərin 2033–2034-cü illərdə təhvil verilməsi planlaşdırılır.
Tenderdə Cənubi Koreyanın Hanwha Ocean şirkəti də iştirak etsə də, Kanada texniki üstünlüklər və Avropa ilə müdafiə əməkdaşlığının genişləndirilməsi baxımından Almaniyanın təklifinə üstünlük verib.
Prestij.media
