Fransada daha bir muzey qarət olunub. Bas-Rin bölgəsində yerləşən Lalique Muzeyinə səhər saatlarında daxil olan maskalı üç nəfər 4,5 milyon avrodan çox dəyəri olan 27 qiymətli zinət əşyasını oğurlayıb.
Məlumata görə, şübhəlilər əvvəlcə muzeyin təcili çıxış və yanğın qapısını sındıraraq binaya daxil olub. Onlar birbaşa zərgərlik bölməsinə keçərək balyoz və çəkiclərlə altı vitrini qırıb, qiymətli eksponatları ələ keçirərək hadisə yerindən qaçıblar.
Hadisə zamanı siqnalizasiya sistemi işə düşsə də, təhlükəsizlik xidmətinin operativ reaksiya vermədiyi bildirilir. Muzey rəhbərliyi bunun ciddi təhlükəsizlik boşluğu olduğunu vurğulayıb və oğruların muzeyin daxili planı barədə əvvəlcədən məlumatlı ola biləcəyini istisna etməyib.
Hadisədən sonra muzey müvəqqəti olaraq ziyarətçilər üçün bağlanıb. Polis təhlükəsizlik kameralarının görüntülərini araşdırır, oğurlanan eksponatların tapılması və şübhəlilərin saxlanılması istiqamətində əməliyyat-axtarış tədbirləri davam etdirilir.
Qeyd edək ki, Lalique Muzeyində məşhur fransız şüşə ustası və zərgəri Rene Laliqin nadir əsərləri nümayiş olunur. Son oğurluq hadisəsi Fransada muzeylərin təhlükəsizliyi ilə bağlı narahatlıqları yenidən gündəmə gətirib.
Prestij.media
