Birləşmiş Millətlər Təşkilatı (BMT) dünya üzrə ən azı 58 ölkə və bölgədə quru minaları və partlamamış hərbi sursatların mülki əhali üçün ciddi təhlükə yaratmağa davam etdiyini açıqlayıb.
BMT-nin İnsan Hüquqları üzrə Ali Komissarı Volker Türk beynəlxalq ictimaiyyəti təcili tədbirlər görməyə çağıraraq bildirib ki, bu təhlükədən ən çox zərər çəkənlər uşaqlardır.
Məlumata görə, quru minaları, kaset bombaları və partlamamış döyüş sursatları 2024-cü il ərzində minlərlə insanın ölümünə və yaralanmasına səbəb olub. Mülki itkilərin əhəmiyyətli hissəsini isə uşaqlar təşkil edir.
Volker Türk vurğulayıb ki, 1997-ci ildə qəbul edilən və 1999-cu ildə qüvvəyə minən Ottava Müqaviləsi üzərindən təxminən 30 il keçməsinə baxmayaraq, minalar hələ də insanların həyatına son qoyur. Onun sözlərinə görə, bu partlayıcılar təkcə müharibə dövründə deyil, münaqişələr başa çatdıqdan sonra da uzun illər təhlükə mənbəyi olaraq qalır.
BMT-nin məlumatına əsasən, hazırda 162 ölkə Ottava Müqaviləsinə qoşulub. Bununla belə, bəzi dövlətlərin hələ də sazişə tərəf olmaması qlobal miqyasda mina təmizləmə işlərini çətinləşdirir.
Hesabatlarda qeyd olunur ki, 1999-cu ildən bu günə qədər mina və partlamamış sursatlardan zərər çəkən mülki şəxslərin 40 faizdən çoxu uşaqlardır. Təkcə 2024-cü ildə bu səbəbdən ən azı 645 nəfər həyatını itirib, 4 min 325 nəfər isə yaralanıb.
Eyni zamanda, mina təmizləmə layihələrinə ayrılan beynəlxalq maliyyə vəsaitlərində ciddi azalma müşahidə olunur. BMT-nin müvafiq fonduna edilən ianələr son illərdə 125 milyon dollardan 46 milyon dollara qədər enib ki, bu da təmizləmə əməliyyatlarının sürətinə mənfi təsir göstərir.
Mütəxəssislər bildirirlər ki, quru minaları müasir müharibələrin ən təhlükəli və uzunmüddətli nəticələrindən biri olaraq qalır. Kənd təsərrüfatı sahələrində, yaşayış məntəqələrində və yolların kənarında qalan partlayıcılar insanların normal həyata qayıtmasını və bölgələrin yenidən qurulmasını ləngidir.
Prestij.media
