Məktəblilərin Respublika İdman Olimpiadası çərçivəsində ağırlıqqaldırma yarışlarına start verilib. Şüvəlan Ağırlıqqaldırma Akademiyasında keçirilən yarışların ilk günündə qızlar körpücük üzərinə çıxaraq medallar uğrunda mübarizə aparıblar.
Yarışın qalibi Qazax təmsilçisi Hənifə Məhərrəmli olub. O, toplamda 160 kq (73 kq + 87 kq) nəticə göstərərək qızıl medala sahib çıxıb.
Gəncə idmançısı Zeynəb Həsənova 134 kq (63 kq + 71 kq) nəticə ilə ikinci yeri tutaraq gümüş medal qazanıb.
Bürünc medala isə paytaxt təmsilçisi Zeynəb Bəkirli layiq görülüb. O, iki hərəkətin cəmində 116 kq (53 kq + 63 kq) nəticə göstərərək fəxri kürsünün üçüncü pilləsinə yüksəlib.
Qeyd edək ki, iştirakçıların nəticələri Sinkler cədvəli üzrə hesablanıb.
Ağırlıqqaldırma yarışlarında 100-dən artıq atlet iştirak edir. Üç gün davam edəcək mübarizədə digər çəki dərəcələri üzrə də qalib və mükafatçıların adlarına aydınlıq gələcək.
