İspaniyanın Afrikadakı Seuta (Ceuta) şəhərində baş verən miqrant böhranı İspaniya ilə İtaliya arasında diplomatik gərginliyə səbəb olub. İtaliya hökuməti İspaniya ilə Şengen rejiminin dayandırılmasını nəzərdən keçirə biləcəyini açıqlayıb, Madrid isə buna etiraz edərək İtaliyanın səfirini Xarici İşlər Nazirliyinə çağırıb.
Fasla sərhəddə yerləşən Seutada minlərlə qanunsuz miqrantın sərhədi keçməyə cəhd etməsi nəticəsində yaranan hadisələr zamanı azı 9 nəfər həyatını itirib. Bundan sonra İtaliya rəsmiləri İspaniya ilə açıq sərhəd rejiminin dayandırılmasının mümkünlüyünü gündəmə gətiriblər.
İtaliyanın Baş naziri Corcia Meloni Seutadakı görüntülərin qanunsuz miqrasiyanın Avropa sərhədləri üçün ciddi təhlükə yaratdığını bildirib. Onun sözlərinə görə, ölkəsi sərhədlərin qorunması, insan alverçilərinə qarşı mübarizə və qanunsuz miqrantların geri qaytarılması siyasətindən geri çəkilməyəcək.
İtaliyanın xarici işlər naziri Antonio Tayani də İspaniyaya münasibətdə Şengen rejiminin dayandırılmasını dəstəklədiyini açıqlayıb və nəzarətsiz miqrasiyanı milli təhlükəsizlik üçün risk adlandırıb.
Bu açıqlamalara cavab olaraq İspaniya hökuməti İtaliyanın Madriddəki səfirini Xarici İşlər Nazirliyinə çağırıb. Xarici işlər naziri Xose Manuel Albares italiyalı həmkarının bəyanatlarını tənqid edərək, Avropa həmrəyliyinin siyasi bəyanatlardan üstün tutulmalı olduğunu vurğulayıb.
Qeyd edək ki, Seutada sərhəddə yaranan böhran zamanı on minlərlə qanunsuz miqrant İspaniya ərazisinə keçməyə cəhd edib. İspaniya hökuməti bölgəyə əlavə təhlükəsizlik qüvvələri və hərbi bölmələr göndərərək sərhəd nəzarətini gücləndirib.
Prestij.media
