Günəş enerjisindən istifadə üçün artıq yalnız fərdi ev və ya dam tələb olunmur. İngiltərədə birbaşa elektrik rozetkasına qoşularaq işləyən günəş panellərinin satışı başlayıb. Balkon və digər açıq sahələrdə quraşdırıla bilən bu sistemlər ənənəvi dam panellərindən daha ucuz başa gəlir.
Yeni sistemlərin bir evdə ildə təxminən 70-110 funt sterlinqə qədər elektrik qənaəti yarada biləcəyi bildirilir. Panellərin günəş görən, kölgəsiz və mümkün qədər cənuba baxan ərazidə yerləşdirilməsi tövsiyə olunur. Sistemlərin gücü təhlükəsizlik səbəbilə 800 vattla məhdudlaşdırılıb və hökumətin məlumatına görə günəşli günlərdə orta evin elektrik tələbatının təxminən beşdə birini qarşılaya bilər.
Sistemlərdə elektrik şəbəkəsinə bağlantını daim nəzarətdə saxlayan mikroinvertor quraşdırılır. Elektrik kəsildikdə və ya panelin fişi çıxarıldıqda sistem millisaniyələr ərzində avtomatik sönür. Mütəxəssislər isə xüsusilə köhnə binalarda elektrik sisteminin əvvəlcə ixtisaslı elektrikçi tərəfindən yoxlanılmasını və uzatma kabelləri ilə adapterlərdən istifadə edilməməsini tövsiyə edir.
Prestij.media
