Macarıstanın paytaxtı Budapeşt şəhərində Avropa Olimpiya Komitələrinin (AOK) 55-ci Baş Assambleyası öz işinə başlayıb.
İki gün davam edəcək tədbirdə Azərbaycanı Milli Olimpiya Komitəsinin vitse-prezidenti Çingiz Hüseynzadə, xarici əlaqələr idarəsinin müdiri Anar Bağırov və beynəlxalq proqramlar idarəsinin müdiri Ceyhun Rəhmanov təmsil edirlər.
Baş Assambleyada Beynəlxalq Olimpiya Komitəsi-nin prezidenti Kristi Koventri, Avropa Olimpiya Komitələri-nin prezidenti Spiros Kapralos və müxtəlif ölkələrin milli olimpiya komitələrinin nümayəndələri iştirak edirlər.
Toplantının ilk günündə İstanbul-2027 Avropa Oyunlarına hazırlıq məsələləri müzakirə olunacaq, həmçinin Milan-Kortina 2026 Qış Olimpiya Oyunları və Milli Olimpiya Komitələri Assosiasiyasının hesabatları dinləniləcək.
Assambleya çərçivəsində “Ən yaxşı avropalı gənc atlet” üçün nəzərdə tutulan Pyotr Nurovski Mükafatı və AOK-un “Xidmətlərinə görə” ordeninə layiq görülmüş şəxslərin mükafatlandırılması da baş tutacaq.
Tədbirin ikinci günündə AOK-un “Olimpiya çələngi” mükafatı təqdim ediləcək. Bundan əlavə, Braşov-2027 Qış Avropa Gənclər Olimpiya Festivalı, Linyano-Sabbiadoro-2027 Avropa Gənclər Yay Olimpiya Festivalı, eləcə də Dünya Antidopinq Agentliyinin tibb və antidopinq sahəsinə dair hesabatları müzakirə olunacaq.
İclasda həmçinin Kiçik Avropa Dövlətlərinin Oyunları ilə bağlı təqdimatlar keçiriləcək və gələcək yeniliklər ətrafında fikir mübadiləsi aparılacaq.
Baş Assambleyanın sonunda AOK-un 56-cı Baş Assambleyasının İstanbul şəhərində keçiriləcəyi elan ediləcək.
