Sakit okeanda yerləşən Palau adalarına daxil olan Ulong adasında invaziv siçanların tamamilə məhv edilməsindən cəmi bir il sonra ekosistemdə ciddi dəyişiklik baş verib. Mərcan rifləri bərpa olunmağa başlayıb, balıq populyasiyasında isə nəzərəçarpacaq artım qeydə alınıb.
Prestij.media xəbər verir ki, araşdırmaya görə, siçanların aradan qaldırılması dəniz quşlarının adaya kütləvi şəkildə qayıtmasına şərait yaradıb. Ulong adasında qəhvəyi dəniz quşlarının sayı qonşu ərazi ilə müqayisədə 286 faiz, digər quş növlərinin sayı isə təxminən 50 faiz artıb. Nəsli təhlükədə olan Palau yer göyərçini də adaya qayıdaraq çoxalmağa başlayıb.
Alimlər bildirirlər ki, dənizdə qidalanaraq adada yuva quran quşların ifraz etdiyi quano yağış suları ilə dənizə daşınır və mərcan rifləri üçün vacib qida maddələri yaradır. Siçanlar isə quşların yumurtalarını və balalarını məhv edərək bu təbii qida dövranını pozurdu. Ulong adasındakı nəticələr göstərib ki, quruda aparılan ekoloji bərpa işləri dəniz canlılarının da daha sürətli bərpasına səbəb ola bilər.
