ABŞ administrasiyası İranla bağlı dəniz nəqliyyatına tətbiq edilən məhdudiyyətlərin dayandırıldığını açıqlayıb.
Prestij.media xəbər verir ki, bu barədə ABŞ Silahlı Qüvvələrinin Mərkəzi Komandanlığı (CENTCOM) məlumat yayıb.
Məlumata əsasən, prezidentin göstərişinə uyğun olaraq İran limanlarına daxil olan və həmin limanlardan çıxan gəmilərin hərəkətinə qoyulan məhdudiyyətlər aradan qaldırılıb. Bildirilib ki, ABŞ qüvvələri artıq Fars və Oman körfəzlərində İran limanları istiqamətində hərəkət edən dəniz nəqliyyatının keçidinə maneə yaratmır.
Açıqlamada qeyd olunub ki, bölgədə fəaliyyət göstərən ABŞ hərbi gəmiləri əldə olunmuş razılaşmaların icrasına nəzarəti davam etdirəcək. Onların əsas missiyası tərəflər arasında əldə edilən öhdəliklərin yerinə yetirilməsini izləməkdən ibarətdir.
Qeyd edək ki, ABŞ və İran arasında gərginliyin azaldılmasını nəzərdə tutan 14 maddədən ibarət memorandum imzalanıb. Sənədin rəsmi təqdimat mərasiminin İsveçrədə keçirilməsi planlaşdırılır.
