İranın ali rəhbəri Müctəba Xamenei ABŞ ilə imzalanmış memorandumla bağlı açıqlama verib.
Prestij.media xəbər verir ki, Xamenei sosial şəbəkədə paylaşdığı müraciətdə sənədin imzalanması ilə bağlı qərarın ölkə rəhbərliyinin məsuliyyəti çərçivəsində qəbul edildiyini bildirib.
O qeyd edib ki, İran Prezidenti Məsud Pezeşkian və Ali Milli Təhlükəsizlik Şurasının üzvləri ölkənin maraqlarının qorunacağına dair öhdəlik götürüblər. Xameneinin sözlərinə görə, bu təminat nəzərə alınaraq memorandumun imzalanmasına razılıq verilib.
Ali rəhbər bildirib ki, ABŞ və İran prezidentləri arasında əldə olunan razılaşma uzun müzakirələrdən sonra mümkün olub. O vurğulayıb ki, proses zamanı müxtəlif siyasi və diplomatik təzyiqlər müşahidə edilsə də, Tehran öz mövqeyini qoruyub saxlayıb.
Müraciətdə həmçinin qeyd olunub ki, İran rəhbərliyi qarşı tərəfin mümkün əlavə tələblərinə qarşı prinsipial mövqe nümayiş etdirəcək və ölkənin maraqlarına zidd addımlara razılıq verməyəcək.
Xatırladaq ki, iyunun 18-də Vaşinqton və Tehran arasında imzalanan memorandum tərəflər arasında 60 günlük danışıqlar mərhələsinin başlanmasını nəzərdə tutur. Sənəddə gərginliyin azaldılması, nüvə proqramı ilə bağlı müzakirələrin aparılması, sanksiyaların mərhələli yumşaldılması və Hörmüz boğazında gəmiçilik təhlükəsizliyinin təmin olunması kimi məsələlər əksini tapıb.
