Yunanıstanda problem yaratdığı düşünülən turistlərin yerləşmə obyektləri tərəfindən “qara siyahı”ya salınması təklifi mübahisələrə səbəb olub. Təklifə əsasən, ciddi qayda pozuntularına yol verən və ya pis rəy yazmaqla sahibkarları təhdid edən turistlərin digər obyektlərə xəbərdar edilməsi nəzərdə tutulur.
Prestij.media xəbər verir ki, təklif sosial şəbəkələrdə geniş müzakirə olunub. Tərəfdarlar bəzi turistlərin pis rəy yazmaqla endirim, pulun geri qaytarılması və əlavə üstünlüklər tələb etdiyini bildirirlər. Qarşı çıxanlar isə turistlərin xidmətlərdən narazı qalmaq və şikayət etmək hüququnun olduğunu vurğulayırlar.
Müzakirələrdə belə bir siyahının yaradılması halında ciddi qaydaların tətbiq edilməsinin vacibliyi qeyd olunur. Turistin siyahıya salınması üçün foto, hesab-faktura, yazışma və digər sübutların tələb edilməsi, həmçinin həmin şəxsin qərardan şikayət etmək imkanının olması təklif edilir. Məsələnin taleyi ilə bağlı hələlik yekun qərar yoxdur.
