Çinin Hubey əyalətində sınaqdan keçirilən eksperimental maqlev vaqonu yüksək sürətli nəqliyyatda diqqətçəkən nəticə göstərib. East Lake Yüksək Sürətli Dəmir Yolu Laboratoriyasının hazırladığı vaqon xüsusi 1 kilometrlik sınaq xəttində sıfırdan saatda 800 kilometr sürətə cəmi 5,3 saniyəyə çatıb.
Prestij.media xəbər verir ki, sistemdə maqnit qaldırma və elektromaqnit itələmə texnologiyasından istifadə olunur. Ənənəvi qatarlar kimi rels və təkər arasında mexaniki təmas olmadığı üçün sürtünmə əhəmiyyətli dərəcədə azalır. Rel boyunca yerləşdirilən elektromaqnitlər güclü maqnit sahəsi yaradaraq vaqonun rels üzərində təmassız hərəkət etməsinə və qısa müddətdə yüksək sürət toplamasına imkan verir.
Tədqiqatçıların əsas hədəflərindən biri saatda 1000 kilometr sürətə çata bilən maqlev sisteminin hazırlanmasıdır. Bu texnologiyanın yalnız sərnişin daşımalarında deyil, gələcəkdə aviasiya və kosmik tədqiqatlarda da istifadə edilə biləcəyi bildirilir. Xüsusilə elektromaqnit sürətləndirmə sistemlərinin kosmik aparatların və peyklərin buraxılmasında alternativ texnologiya kimi tətbiqi nəzərdən keçirilir.
