Prestij.media xəbər verir ki, Almaniyada parklanma qaydalarının pozulmasını avtomatik aşkarlayan yeni nəzarət sistemi istifadəyə verilib. Nömrə tanıma texnologiyası ilə işləyən xüsusi avtomobillər saniyələr ərzində minlərlə avtomobilin qeydiyyat nişanını yoxlaya biləcək.
Yeni sistem vasitəsilə avtomobilin parklanma icazəsinin olub-olmaması, qadağan olunmuş ərazidə saxlanılıb-saxlanılmadığı avtomatik müəyyən ediləcək. Qayda pozuntusu aşkar olunduğu halda cərimə proseduru dərhal başladılacaq.
Rəsmilər bildiriblər ki, qaydalara uyğun park edilmiş avtomobillərin məlumatları sistemdən avtomatik silinəcək, yalnız pozuntu qeydə alınan nəqliyyat vasitələrinin məlumatları saxlanılacaq.
Pilot layihələrin nəticələrinə əsasən, yeni texnologiya ənənəvi yoxlamalarla müqayisədə xeyli vaxta qənaət etməyə və daha çox qayda pozuntusunu aşkar etməyə imkan verir.
