Avropada qadınlara seçkilərdə səsvermə hüququnu ən gec verən Lixtenşteyn qadınların dövlət başçısı olmasına mane olan son hüquqi əngəli də aradan qaldırıb. Bununla Avropada qadınların ölkə idarəçiliyinə gəlməsinə hüquqi məhdudiyyət qoyan heç bir ölkə qalmayıb.
Prestij.media xəbər verir ki, Avstriya ilə İsveçrə arasında yerləşən kiçik Lixtenşteyn dövləti taxtın yalnız atadan oğula keçməsini nəzərdə tutan vərəsəlik qaydalarını dəyişib. Yeni qaydalara əsasən, oğlan uşaqlarına üstünlük verilməsi ləğv olunub və cinsindən asılı olmayaraq ailədə doğulan ilk uşaq taxtın varisi sayılacaq. Qərar Şahzadə Aloisin açıqlamasına görə, hakim sülalənin üçdə iki səs çoxluğu ilə qəbul edilib.
Təxminən 40 min əhalisi olan Lixtenşteyndə hakim şahzadənin referendumlara veto qoymaq, hakimləri təyin etmək və hökuməti buraxmaq kimi geniş səlahiyyətləri var. Ölkə qadınlara seçkilərdə səsvermə hüququnu yalnız 1984-cü ildə tanıyıb və bununla Avropada bu hüququ ən gec verən dövlət olub. Yeni vərəsəlik islahatı ölkənin ənənəvi idarəçilik modelində tarixi dəyişiklik kimi qiymətləndirilir.
