Texnologiya nəhəngi Apple oğurluq hallarına qarşı mübarizə məqsədilə iPhone-lar üçün yeni təhlükəsizlik mexanizmini aktivləşdirib. Yeni funksiya sayəsində oğurlanan cihazlar sahibinin təsdiqi olmadan istifadəyə yararsız vəziyyətə düşəcək.
Şirkətin son sistem yeniləməsi ilə istifadəyə verilən “Oğurlanmış cihazın qorunması” funksiyası istifadəçilərin məlumatlarını və hesablarını daha etibarlı şəkildə qorumağa imkan verir. Telefon itirildikdə və ya oğurlandıqda sahibi cihazı uzaqdan “itkin” kimi qeyd edə bilir. Bundan sonra iPhone yalnız sahibinin məlumatları ilə yenidən aktivləşdirilə bilər.
Yeni sistem oğruların cihazın şifrəsini dəyişərək onu yenidən istifadəyə verməsinin və ya satmasının qarşısını almağı hədəfləyir. Mütəxəssislər hesab edirlər ki, bu addım oğurlanmış telefonların qara bazarda satışını əhəmiyyətli dərəcədə azalda bilər.
Qeyd edək ki, son illər xüsusilə Böyük Britaniyada mobil telefon oğurluqlarının artması texnologiya şirkətlərini əlavə təhlükəsizlik tədbirləri görməyə vadar edib.
//Prestij.media
