Google süni intellekt platforması Gemini üçün uzun müddətdir gözlənilən “Avatar” funksiyasını istifadəyə verib. Yeni funksiya sayəsində istifadəçilər hər dəfə yeni vizual yaratmaq üçün yenidən şəkil yükləmək məcburiyyətində qalmayacaqlar.
Prestij.media xəbər verir ki, istifadəçilər bir dəfə öz rəqəmsal avatarlarını yaratdıqdan sonra həmin avatar Gemini-nin şəkil yaratma alətlərində onları avtomatik təmsil edəcək. Beləliklə, fərqli geyimlərdə, məkanlarda və ya müxtəlif bədii üslublarda təsvirlər hazırlamaq üçün yenidən foto yükləməyə ehtiyac olmayacaq.
Avatar yaratmaq üçün istifadəçilər Gemini-nin veb versiyasına daxil olaraq “Əlavə et” > “Daha çox yükləmə” > “Avatar” bölməsinə keçməlidirlər. Daha sonra ekranda görünən QR kod mobil telefon vasitəsilə oxudulur, qısa üz və səs qeydi tamamlandıqdan sonra avatar istifadəyə hazır olur.
Google bildirib ki, yeni funksiya mərhələli şəkildə istifadəyə verilir. Xidmətdən yararlanmaq üçün istifadəçinin 18 yaşı tamam olmalı, şəxsi Google hesabından istifadə etməli və dəstəklənən Google AI abunəliyinə sahib olması tələb olunur.
Şirkətin məlumatına görə, Avropa İqtisadi Bölgəsi, İsveçrə və Böyük Britaniyada yaşayan istifadəçilər hələlik bu funksiyadan yararlana bilmirlər.
Google həmçinin qeyd edib ki, istifadəçilər istədikləri vaxt yaratdıqları avatarı silə və ya yenidən formalaşdıra bilərlər. Bunun üçün Gemini ayarlarındakı “Şəxsi Avatar” bölməsindən istifadə etmək kifayətdir.
