Azərbaycan İdman Akademiyasında (ASA) Amerika Birləşmiş Ştatlarının (ABŞ) Azərbaycandakı səfirliyinin müvəqqəti işlər vəkili Emi Karlonun rəhbərlik etdiyi nümayəndə heyəti ilə görüş keçirilib.
Prestij.media-nın məlumatına görə, qonaqlar əvvəlcə Akademiyanın MediaLab və İdman Tibbi Tədqiqatları Laboratoriyasının fəaliyyəti ilə tanış olublar. Nümayəndə heyətinə təhsil ocağında yaradılmış müasir tədris və elmi-tədqiqat infrastrukturu barədə ətraflı məlumat təqdim edilib.
Görüş zamanı ASA-nın rektoru Fuad Hacıyev ali təhsil müəssisəsinin tarixi, elmi-tədris mühiti və beynəlxalq əməkdaşlıq istiqamətləri barədə danışıb. O bildirib ki, Akademiya ABŞ-ın aparıcı universitetləri ilə akademik əlaqələrin genişləndirilməsində və uzunmüddətli tərəfdaşlıqların qurulmasında maraqlıdır.
ABŞ-ın Azərbaycandakı səfirliyinin müvəqqəti işlər vəkili Emi Karlon isə elm və təhsil sahəsində əməkdaşlığın xalqlar arasında qarşılıqlı anlaşmanın və dostluq münasibətlərinin möhkəmlənməsində mühüm rol oynadığını vurğulayıb.
Görüşdə ASA ilə ABŞ-ın nüfuzlu ali təhsil müəssisələri arasında əməkdaşlıq imkanları, birgə layihə və tədbirlərin həyata keçirilməsi məsələləri müzakirə olunub. Tərəflər tələbə və müəllim mübadiləsinin təşkili, eləcə də beynəlxalq layihələrin birgə icrası istiqamətində fikir mübadiləsi aparıblar.
