Kaliforniyada San-Andreas və San-Xasinto qırılma xətlərinin kəsişdiyi Kacón keçidində tektonik gərginliyin son min ilin ən yüksək səviyyəsinə çatdığı bildirilir. Futura Sciences jurnalında dərc olunan araşdırmaya görə, bu ərazidə toplanan enerji güclü zəlzələ riskini artıra bilər.
Tədqiqatçılar qeyd edirlər ki, qırılma xətlərindən birində baş verən hərəkət digərinə də təsir göstərə bilər. Bu isə zəlzələnin əhatə dairəsini və dağıdıcı təsirini artıra bilər. Kaliforniya Sakit okean və Şimali Amerika tektonik plitələrinin sərhədində yerləşir və plitələr ildə təxminən 5 santimetr hərəkət edir.
Araşdırmada 1857-ci ildə bölgədə baş vermiş 7,9 bal gücündə zəlzələyə də diqqət çəkilir. Bununla belə, alimlər növbəti böyük zəlzələnin nə vaxt baş verəcəyini dəqiq müəyyənləşdirməyin mümkün olmadığını vurğulayırlar. Onlar bölgədə risk qiymətləndirmələrinin və fövqəladə vəziyyət planlarının yenilənməsinin vacibliyini bildirirlər.
Prestij.media
