İtaliyanın Siciliya adasında baş verən güclü burulğanlar ciddi dağıntılara səbəb olub. Marsala, Petrosino və Mazara-del-Valo şəhərlərində evlərə ziyan dəyib, avtomobillər və yük maşınları aşıb, elektrik dirəkləri sınıb və ağaclar kökündən qopub. Bir evin tamamilə dağıldığı bildirilir.
Güclü külək Marsala şəhərindəki Alcide De Gasperi məktəbinə də zərər vurub. Binanın pəncərələri sınıb, tavanın bəzi hissələri çöküb. Hadisə zamanı məktəbdə olan 273 şagird təhlükəsiz əraziyə təxliyə edilib. Bəzi uşaqların yüngül xəsarət aldığı qeyd olunur. Burulğan nəticəsində avtomobillərdən birinin uçuruma düşməsi zamanı iki nəfər də yaralanaraq xəstəxanaya aparılıb.
Siciliyanın mülki müdafiə qurumları hadisənin bölgədə uzun illər ərzində müşahidə olunmayan gücdə olduğunu bildiriblər. Hazırda zərərin miqyası qiymətləndirilir və ərazidə yeni fırtına ehtimalına qarşı xəbərdarlıqlar davam edir.
Prestij.media
