Qazaxıstan və Özbəkistan arasında yerləşən Aral gölünün quruması yeni ekoloji təhlükə yaradıb. Vaxtilə dünyanın dördüncü ən böyük göllərindən biri olan Aral 1960-cı illərdən etibarən sürətlə kiçilməyə başlayıb. Elmi araşdırmaya görə gölün qurumuş dibindən 1960-cı ildən bəri atmosferə təxminən 748 milyon ton karbon qazı buraxılıb.
Tədqiqatçılar bildirirlər ki, suyun çəkilməsi nəticəsində gölün dibində toplanmış üzvi maddələr hava ilə təmasda olub və parçalanaraq karbon qazının atmosferə yayılmasına səbəb olub. Gölün təxminən 90 faizinin quruduğu qeyd edilir. Qurumuş ərazilərdə qalan karbon ehtiyatları isə gələcəkdə də istixana qazlarının yayılması riski yaradır.
Araşdırmaya əsasən, gölün yenidən su ilə örtülməsi təxminən 605 milyon ton karbon qazının atmosferə buraxılmasının qarşısını ala bilər. Bunun üçün suvarma sistemlərinin yaxşılaşdırılması, su itkisinin azaldılması və region ölkələrinin əməkdaşlığı vacib sayılır.
Prestij.media
