ABŞ-ın məşhur cins geyim istehsalçısı Levi’s Avstraliyanın Globe geyim şirkətinə və ona məxsus S-Double brendinə qarşı məhkəmə iddiası qaldırıb.
Prestij.media xəbər verir ki, şirkət S-Double brendini Levi’s-in əmtəə nişanı ilə qorunan cib etiketi dizaynını təqlid etməkdə ittiham edir.
Məlumata görə, Levi’s iddiasında S-Double tərəfindən istifadə edilən etiketlərin istehlakçılarda çaşqınlıq yarada biləcəyini və şirkətin tanınmış brend imicinə zərər vurduğunu bildirib.
Məhkəmə sənədlərində S-Double əmtəə nişanının pozulması, haqsız rəqabət, yalançı reklam və məhsulun xarici görünüşünün təqlid olunması kimi hallarda günahlandırılır.
Levi’s qeyd edib ki, cib üzərində yerləşdirilən kiçik parça etiket 1936-cı ildən etibarən brendin əsas fərqləndirici simvollarından biri hesab olunur və dünya üzrə istehlakçılar tərəfindən tanınır.
Şirkət iddia edir ki, sözügedən dizaynın təqlidi satışlara və brendin nüfuzuna mənfi təsir göstərib. Hazırda işə ABŞ-ın Kaliforniya ştatının şimal dairə məhkəməsində baxılır.
