WhatsApp iPhone istifadəçiləri üçün yeni məxfilik funksiyası üzərində işləyir. Məşhur mesajlaşma platforması artıq mətn mesajları üçün də “bir dəfə bax” funksiyasını istifadəyə verməyə hazırlaşır.
iOS-un beta versiyasında aşkar edilən yeniliyə əsasən, istifadəçilər göndərdikləri mətn mesajlarını yalnız bir dəfə oxunacaq şəkildə paylaşa biləcəklər. Mesaj oxunduqdan sonra avtomatik olaraq silinəcək və yenidən açılması mümkün olmayacaq.
Yeni funksiyanın ən diqqətçəkən xüsusiyyətlərindən biri isə mesajların saxlanılması, başqa istifadəçilərə yönləndirilməsi və ekran görüntüsünün alınmasının qarşısının alınmasıdır. Bu, istifadəçilərin şəxsi məlumatlarını daha təhlükəsiz şəkildə paylaşmasına imkan verəcək.
Məlumata görə, funksiya həm fərdi söhbətlərdə, həm də qrup çatlarında aktiv olacaq. Lakin kanallarda istifadəsi nəzərdə tutulmur.
Hazırda test mərhələsində olan yeniliyin bütün iPhone istifadəçilərinə nə vaxt təqdim ediləcəyi açıqlanmasa da, yaxın aylarda mərhələli şəkildə istifadəyə verilməsi gözlənilir.
WhatsApp bu addımla uçdan-uca şifrələmə və itən mesajlar funksiyalarını daha da gücləndirərək istifadəçi məxfiliyini yeni səviyyəyə qaldırmağı hədəfləyir.
//Prestij.Media
