Prestij.media xəbər verir ki, NATO Zirvəsinə dəvət almayan Gürcüstanda ölkənin beynəlxalq mövqeyi ilə bağlı müzakirələr güclənib. Siyasi dairələrdə bunun Gürcüstanın beynəlxalq platformalarda nüfuzunun zəifləməsinin göstəricisi olduğu bildirilir.
Müxalifət və bir sıra ekspertlər hesab edirlər ki, NATO-nun rəsmi proqramında Gürcüstanın yer almaması ölkənin Qərblə münasibətlərində yaranmış gərginliyin nəticəsidir. Onların fikrincə, Tbilisi artıq əvvəlki kimi etibarlı tərəfdaş kimi qəbul edilmir.
Hakim Gürcü Arzusu Partiyası isə bu iddiaları rədd edərək bildirib ki, builki sammit əvvəlki illərdən fərqli formatda keçirilib və dəvətlə bağlı qərar siyasi məna daşımır.
Qeyd edək ki, son dövrlər Gürcüstanın Avropa İttifaqı və NATO ilə münasibətləri “xarici təsir” qanununun qəbulundan və ölkədə baş verən etiraz aksiyalarından sonra daha da gərginləşib. Bu səbəbdən ölkənin beynəlxalq mövqeyi ətrafında müzakirələr davam edir.
