Macarıstanda parlament ölkənin siyasi sistemində ciddi dəyişiklikləri nəzərdə tutan Konstitusiyaya 17-ci düzəlişi qəbul edib. Dəyişikliklər qüvvəyə minərsə, hazırkı Prezident Tamaş Şulyokun səlahiyyətlərinə vaxtından əvvəl xitam veriləcək.
Prestij.media xəbər verir ki, qanun layihəsi parlamentdə keçirilən səsvermədə 139 lehinə, 6 əleyhinə səslə qəbul olunub. 54 deputat isə səsvermədə iştirak etməyib.
Yeni qaydalara əsasən, qanun qüvvəyə mindiyi günün ertəsi prezidentin səlahiyyət müddəti başa çatacaq. Bundan sonra parlament yeni dövlət başçısını seçəcək.
Baş nazir Peter Maqyar mövcud Konstitusiyanı sərt tənqid edərək, islahatların dövlət institutlarının fəaliyyətini demokratik prinsiplərə uyğunlaşdırmaq məqsədi daşıdığını bildirib.
Müxalifətdə olan Fidesz və KDNP partiyaları isə səsverməni boykot edib. Fidesz parlament fraksiyasının rəhbəri Gergely Qulyaş qəbul edilən dəyişiklikləri demokratiyaya zidd addım kimi qiymətləndirərək istefa verdiyini açıqlayıb.
Hazırda Prezident Tamaş Şulyokun qanunu imzalamaq üçün 5 günlük qanuni müddəti var. O, sənədi imzalamayacağı təqdirdə parlament tərəfindən impiçment proseduruna başlanıla bilər.
Qəbul edilən konstitusiya paketi prezidentin səlahiyyətləri ilə yanaşı, digər mühüm islahatları da əhatə edir. Belə ki, deputatlar üçün 12 illik (3 çağırış) fəaliyyət limiti müəyyənləşdirilib, Konstitusiya hakimləri üçün isə 70 yaş həddi təsbit olunub.
