Almaniyada isti havaların təsiri ilə mənzillərə kondisioner quraşdırılması ətrafında yaranan mübahisə Federal Məhkəmənin presedent xarakterli qərarı ilə yekunlaşıb.
Qərara əsasən, çoxmənzilli binalarda yaşayan mənzil sahiblərinin balkonlarına xarici bloklu split kondisioner quraşdırmaq tələbi, bir qayda olaraq, qəbul edilməlidir. Məhkəmə bildirib ki, bu hüquq yalnız digər sakinlərin hüquqlarını ciddi və ədalətsiz şəkildə pozduğu hallarda məhdudlaşdırıla bilər.
Mübahisə Berlində yaşayan bir ailənin evinə kondisioner quraşdırmaq üçün digər mənzil sahiblərindən razılıq ala bilməməsi ilə başlayıb. İş əvvəlcə aşağı instansiya məhkəməsində rədd edilsə də, sonradan Federal Məhkəməyə qədər gedib çıxıb.
Məhkəmə həmçinin qeyd edib ki, qərar verilərkən kondisionerin quraşdırılmasının birbaşa təsirləri nəzərə alınmalıdır. Gələcəkdə yarana biləcək səs-küy kimi amillər isə bu mərhələdə əsas meyar hesab edilmir.
Almaniyada fərdi ev sahibləri təhlükəsizlik qaydalarına riayət etməklə kondisioner quraşdırmaqda sərbəstdirlər. Kirayədə yaşayan şəxslər isə belə sistem quraşdırmaq üçün ev sahibinin icazəsini almalıdırlar. Xarici bloku olmayan daşınan kondisionerlər üçün isə xüsusi icazə tələb olunmur.
Prestij.media
