Türkiyə İranla sərhədin təhlükəsizliyini gücləndirmək məqsədilə Van vilayətində həyata keçirdiyi layihə çərçivəsində 6 kilometrlik polad divar tikib.
Vanın İranla sərhədində terrorizm, qaçaqmalçılıq və qeyri-qanuni miqrasiyaya qarşı mübarizə məqsədilə həyata keçirilən təhlükəsizlik tədbirləri davam edir. 2021-ci ildə Çaldıran, Özalp, Saray və Başkale rayonlarını əhatə edən 305 kilometrlik sərhəd təhlükəsizlik divarı layihəsinə start verilib və artıq onun 235 kilometrlik hissəsi tamamlanıb.
Layihənin Başkale istiqamətində yerləşən son 70 kilometrlik hissəsində işlər davam etdirilir. Coğrafi şəraitin çətin olduğu 6 kilometrlik ərazidə isə ilk dəfə olaraq 1 metr hündürlüyündə beton əsas üzərində 5 metrlik polad konstruksiya və 90 santimetrlik tikanlı məftildən ibarət modul divar sistemi quraşdırılıb.
Sərhəd xətti elektro-optik müşahidə qüllələri, termal kameralar, radar sistemləri, müasir sensorlar, fototələlər, pilotsuz uçuş aparatları və pilotsuz yerüstü nəqliyyat vasitələri ilə 24 saat nəzarətdə saxlanılır.
Bundan əlavə, hava təhdidlərinə qarşı antidron sistemləri, hava hücumundan müdafiə qurğuları, zirehli texnika, snayper qrupları və komando bölmələri sərhədin strateji nöqtələrində yerləşdirilib.
Prestij.media
