Prestij.media xəbər verir ki, İspaniyanın ən kiçik məskunlaşmış adası olan Tabarka həm tarixi irsi, həm də dəniz ekosisteminin qorunması ilə diqqət çəkir. Aralıq dənizində yerləşən ada 1986-cı ildən ölkənin ilk rəsmi dəniz qoruğu statusunu daşıyır.
Bu səbəbdən adanın ətrafındakı suların müəyyən hissələrində son 40 il ərzində balıq ovuna tam qadağa tətbiq edilir. Məhdudiyyətlər sualtı flora və faunanın qorunmasına, balıq ehtiyatlarının bərpasına və ekoloji tarazlığın saxlanmasına xidmət edir.
Təxminən 1,8 kilometr uzunluğunda olan Tabarka adası XVIII əsrdə salınmış tarixi yaşayış məntəqəsi, qala divarları və qədim tikililəri ilə də tanınır. Burada avtomobil hərəkəti demək olar ki, yoxdur və turistlər adanı piyada gəzərək kəşf edirlər.
Mütəxəssislər hesab edirlər ki, uzun illər tətbiq olunan bu qoruma tədbirləri Tabarkanın dəniz ekosisteminin zənginləşməsində mühüm rol oynayıb və ada hazırda Aralıq dənizinin ən yaxşı qorunan təbii ərazilərindən biri sayılır.
