İspaniyada yol tikintisi zamanı təsadüfən aşkar edilən kəhrəba yatağından 105 milyon il əvvələ aid 1 500-dən çox fosil nümunəsi tapılıb.
Ölkənin şimalındakı Kantabriya bölgəsində yerləşən El Soplao yatağı 2005-ci ildə yol işləri zamanı üzə çıxıb. Sonrakı araşdırmalar zamanı burada 40 yeni canlı növü müəyyən edilib.
Kəhrəbanın içərisində hörümçəklər, həşəratlar, xərçəngkimilər və digər canlılara aid qalıqlar aşkarlanıb. Bəzi nümunələrin anatomik detalları milyonlarla il keçməsinə baxmayaraq yüksək səviyyədə qorunub.
El Soplao kəhrəbasının ən diqqətçəkən xüsusiyyətlərindən biri onun mavi-bənövşəyi rəngdə parlamasıdır. Alimlər bu rəngin guaiazulene adlı kimyəvi birləşmə ilə əlaqəli olduğunu bildirirlər.
Tapıntılar arasında məlum olan ən qədim gənə nümunələrindən biri, üzərində müxtəlif hissəciklər daşıyan milçək sürfəsi və teropod dinozavrlarına aid tüklər də var.
Tədqiqatçılar təxminən 20 ildir davam edən araşdırmaların qədim ekosistemin necə olduğunu anlamağa imkan verdiyini bildirirlər.
Prestij.media
