İyunun 18-də Azərbaycanda bəzi yerlərdə temperaturun 36 dərəcəyədək yüksələcəyi gözlənilir.
Milli Hidrometeorologiya Xidmətinin təqdim etdiyi rəsmi məlumatlara görə, Bakı şəhəri və Abşeron yarımadasında hava şəraiti dəyişkən buludlu olacaq, əsasən yağmursuz keçəcək. Gündüz saatlarında şimal-qərb istiqamətli küləyin cənub-şərq küləyi ilə əvəzlənəcəyi bildirilir. Paytaxtda və yarımadada termometrlər gecə saatlarında 19-22° isti, gündüz isə 30-35° isti göstərəcək. Atmosfer təzyiqi 763 mm civə sütunundan 759 mm civə sütununa enəcək, nisbi rütubət isə gecə 70-75 %, gündüz isə 40-50 % həddində dəyişəcək.
Ölkənin regionlarında da havanın əksər yerlərdə yağmursuz keçəcəyi gözlənilir. Lakin günün ikinci yarısından etibarən bəzi dağlıq və dağətəyi ərazilərdə arabir leysan xarakterli yağış yağacağı, şimşək çaxacağı və dolu düşəcəyi ehtimal olunur. Gecə və səhər saatlarında bəzi bölgələri duman bürüyəcək, mülayim qərb küləyi əsəcək.
Rayonlarda havanın temperaturunun gecə 19-22° isti, gündüz 31-36° isti, dağlıq ərazilərdə isə gecə 10-15° isti, gündüz 20-25° (bəzi yerlərdə 27-30° isti) təşkil edəcəyi proqnozlaşdırılır.
