Fransanın paytaxtı Parisdə yerləşən dünyaca məşhur Luvr muzeyi köhnəlmiş infrastruktur və təhlükəsizlik problemləri səbəbindən müvəqqəti bağlanma riski ilə üzləşib. Muzeyin direktoru Kristof Leribo bildirib ki, genişmiqyaslı yenilənmə işləri aparılmasa, müəssisə ziyarətçilər üçün fəaliyyətini dayandırmalı ola bilər.
2025-ci il oktyabrın 19-da muzeydə baş verən və cəmi 7 dəqiqə davam edən oğurluq zamanı səkkiz tarixi zinət əşyası aparılıb. Təhlükəsizlik tədbirləri gücləndirilsə də, oğurlanan əşyalar hələ tapılmayıb. Hadisə ilə əlaqədar dörd şübhəli saxlanılıb.
Muzeydə eskalatorların, havalandırma və işıqlandırma sistemlərinin, eləcə də tavanın yenilənməsi planlaşdırılır. Yay aylarında həddindən artıq isti səbəbindən ziyarətçilərin sayının 8 faiz azaldığı da bildirilir. Təxminən 9 milyon ziyarətçi qəbul edən muzeyin yenilənməsini nəzərdə tutan “Yeni İntibah” layihəsinin 15 ilədək davam edə biləcəyi ehtimal olunur.
Prestij.media
