Milli Qurtuluş Gününə həsr olunan XXIX “Şahin” hərbi-idman oyununun final mərhələsi bu il “Gənclər Paytaxtı” seçilmiş Goranboy rayonunda təşkil olunub.
Tədbirdə gənclər və idman naziri Fərid Qayıbov, Goranboy Rayon İcra Hakimiyyətinin başçısı Məhərrəm Quliyev, Heydər Əliyev adına Hərbi İnstitutun rektoru, general-mayor Ümüdvar Quliyev və digər rəsmi şəxslər iştirak ediblər.
Yarışdan əvvəl Şəhidlər Xiyabanı ziyarət olunub, daha sonra isə ümummilli lider Heydər Əliyevin abidəsinə hərbi orkestrin müşayiəti ilə dövlət bayrağı yürüşü təşkil edilib.
Rəsmi açılış mərasimindən sonra yarışlara start verilib. Final mərhələsində ölkənin müxtəlif bölgələrini təmsil edən 14 komanda sıra hazırlığı, avtomatın sökülüb-yığılması, fiziki hazırlıq, maneələrin dəf edilməsi, atıcılıq, mülki müdafiə, çadırın qurulması və intellektual yarışlar üzrə bacarıqlarını nümayiş etdiriblər.
Prestij.Media xəbər verir ki, yarışın yekun nəticələrinə əsasən, Bakı şəhərinin Binəqədi rayon komandası birinci, Nizami rayon komandası ikinci, İsmayıllı rayon komandası isə üçüncü yerə layiq görülüb.
Tədbir Müdafiə Nazirliyinin Xüsusi Təyinatlı Dəstəsinin nümunəvi çıxışı, bayram konserti və möhtəşəm atəşfəşanlıqla başa çatıb.
